

D3162

ནད་ཉེ་བར་ཞི་བར་བྱེད་པའི་ཕན་ཡོན་ཆེན་པོ་དང་ལྡན་པ་སྟེ། པདྨ་གར་གྱི་དབང་ཕྱུག་གི་སྒྲུབ་ཐབས་རྫོགས་སོ།། །།མཁས་པ་རཏྣ་ཨཱ་ཀ་རའི་ཞལ་སྔ་ནས་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།།[་]@##། །རྒྱ་གར་སྐད་ དུ།ཧ་རི་ཧ་རི་ཧ་རི་བཱ་ཧ་ན་སཱ་དྷ་ནཾ། བོད་སྐད་དུ། སེང་གེ་དང་བྱ་ཁྱུང་དང་ཁྱབ་འཇུག་ལ་བཞུགས་པའི་སྒྲུབ་ཐབས། སྔར་བརྗོད་པའི་རིམ་པ་ཉིད་ཀྱིས་སྟོང་པ་ཉིད་བསྒོམས་པའི་རྗེས་ཐོགས་ལ། ཡི་གེ་ཧྲཱིཿདཀར་པོ་ཡོངས་སུ་རྫོགས་པར་གྱུར་པ་ལས། སེང་གེ་དང་བྱ་ཁྱུང་དང་ཁྱབ་ འཇུག་ལ་བཞུགས་པ་ལས་བྱུང་བའི་བཅོམ་ལྡན་འདས་སྤྱན་རས་གཟིགས་དབང་ཕྱུག་ཏུ་བདག་ཉིད་བསྒོམ་པར་བྱ་སྟེ།སྐུ་ཐམས་ཅད་དཀར་བ་རལ་བ་དང་དབུ་རྒྱན་དང་ལྡན་པ་ཞི་བའི་ཆ་བྱད་ཅན་ཕྱག་གཡས་པས་བཅོམ་ལྡན་འདས་དེ་བཞིན་གཤེགས་པ་དབང་དུ་མཛད་པ། གཉིས་ པས་ཕྲེང་བ་བསྣམས་པ་གསུམ་པས་ཚུལ་ངན་པར་གནས་པའི་འཇིག་རྟེན་པ་རྣམས་སྟོན་པར་མཛད་དོ།།གཡོན་པས་དབྱུག་ཐོ་བསྣམས་པ་གཉིས་པས་རི་དྭགས་ཀྲིཎྜ་ས་རིའི་པགས་པ་བསྣམས་པ། གསུམ་པས་རིལ་པ་སྤྱི་བླུགས་བསྣམས་པའོ། །སེང་གེ་དང་བྱ་ཁྱུང་དང་ཁྱབ་ ་འཇུག་གི་ཕྲག་པ་ན་གནས་པར་རོ།